Vic Nierva's Podcast

"Pagsakay sa Tren" Daíng giróng an istasyón. Alágad an nagkakápirang mga daghán igwáng pag-alángan, tibáad, huli sa mga bábayáan o mga aabtan. Asín mamansayan an nagbábaklay pang bulan sa ibábaw kan mga kabukídan, mga niyugán, o madidiklóm pang mga badáng na tibáad man daí na liwát magudák o matanumán, minsán sa likód kan panátang mabalik liwát. Minákusog an mga buót huli ta malulúya pa an dagubdób kan paabúton na tren asín man an hinghíng pang pagsilbáto. Harayô pa, harayô pa. Alágad igwáng tikbá, o pùngáw sa huring kugos o huring hadók sa namúmùtan. Alágad, pag sinasarà na kan kakahúyan an tingráw kan tren na minápasilyab sa mga kabóg na nagrúrulupádan, mináiktin an mga bitís, dagos kapót sa mga daradára, patí naman sa daghán na uróg pang panô nin bagáhi—agóm, akì, tugang, katúod, girumdóm asín an sadíring haróng. Asín sa pag-abót kan tren, pagdangádang sa andén, mináiba an kulór kan kublít, nagígin siring iní sa buláwan— mináliwánag an lawog siring sa nakapintáng kaugmáhan. Tibáad nakahilíng